Uppbygging íbúðarhúsnæðis á norðanverðri Arnarneshæð

Í tillögum þessum er lögð áhersla á að laga fyrirhugaða byggð að landslagi og umhverfi svæðisins og að heildarskipulagið marki þessum nýja bæjarhluta sjálfstætt yfirbragð. Hið „náttúrulega“ umhverfi svæðisins er borg, bær og umferð, ekki síður en nálægð við sjó og útsýni til fjalla. Garðar eru samtengdir sameiginlegu útivistarsvæði sem tengist suðurhlíðum Arnarneshæðarinnar.

ÍBÚÐARBYGGÐ Í LANDI AKRALANDS (M-2)
Í þessum samanburðartillögum er unnið að sköpun stefnumarkandi áætlunar um framtíð M-2 svæðisins á norðanverðum Arnarneshálsi. Gert er ráð fyrir að svæðið í heild sinni verði nýtt til íbúðabyggðar.
Um leið og leitast er við að skapa svæðinu sterkan heildarsvip er einnig litið á það sem hluta af nærliggjandi byggð og þá helst í samhengi við áætlaða nýbyggð Akrana sunnan Arnarnesvegar sem og eldri byggð á Arnarnesinu. Lögð er áhersla á að skoða þá þætti sem myndað gætu samkennd íbúanna sem hverfið munu byggja og gera það að heilstæðu samfélagi með ótvíræðum tengslum við samfélag Garðabæjar.

UMHVERFI OG LANDSLAG
Í tillögum þessum er lögð áhersla á að laga fyrirhugaða byggð að landslagi og umhverfi svæðisins og að heildarskipulagið marki þessum nýja bæjarhluta sjálfstætt yfirbragð. Hið „náttúrulega“ umhverfi svæðisins er borg, bær og umferð, ekki síður en nálægð við sjó og útsýni til fjalla. Neðri hluti svæðisins snýst ekki síst um vissa innhverfu þar sem útivistarsvæði og mannlífið í hverfinu gleður augað, ekki síður en útsýni lengra til. Í landinu ofanverðu er fyrir komið meiri byggingarmassa, sem er brotinn upp til að hleypa birtu að lægri byggðinni. Þessi hærri byggð nýtir hæðina í legu landsins og útsýnið sem þar skapast til sjávar í vestur og fjallahringsins í norður og suður. Þessi „efri“ og „neðri“ byggð er svo skipulögð í tengslum við grænan miðkjarna sem tengir íbúana og ekki síst yngri kynslóð svæðisins saman. Við skipulagningu þarf að taka tillit til öryggis gangandi sem og akandi umferðar jafnt og að tryggja þarf að yfirbragð hverfisins verði aðlaðandi, og stuðlað sé að vellíðan íbúanna. Markviss gróðursetning, frágangur yfirborðsflata, lýsing umferðar-, gönguleiða og útivistarsvæða sem og lögun þeirra svæða og stærð eru mikilvægir þættir í mótun og yfirbragði hverfisins.

Áhersla er lögð á að grænu svæðin setji sterkan svip á hverfið: að þetta verði „garðahverfi“. Um leið og útivistarsvæði hins græna miðáss er aðgengilegt fyrir alla íbúa hverfisins mun hann einnig nýtast sem tengistígur í þá skóla og þjónustu sem sækja þarf suður fyrir Arnarnesveg. Þessu nýja hverfi er ætlað að vera andlit Garðabæjar úr norðri og má þar af leiðandi bera „höfuðið“ hátt og taka vel á móti þeim sem bæjarfélagið sækja. Hærri byggingum er þannig komið fyrir efst í landinu sem stoltum kennileitum við þessi endimörk bæjarins í norðri.

ÍBÚAR OG SAMFÉLAG
Nýleg dæmi um uppbyggingu á höfuðborgarsvæðinu voru höfð til hliðsjónar sem og þau einkenni samfélags Garðabæjar sem gera hann ólíkan nærliggjandi bæjarfélögum. Við teljum að þessar skipulagshugmyndir rúmi á þægilegan máta milli 380 og 410 íbúðir á svæðinu.

Við útreikninga á stærð og íbúafjölda hverfisins þótti ljóst að gera yrði ráð fyrir leikskóla í hverfinu sem gæti rúmað um þrjár deildir. Er gert ráð fyrir leikskóla, sem rúmað gæti fjórar deildir og þar með nýst nágrannahverfum um leið. Þörf á grunnskóla fyrir hverfið var einnig skoðuð og varð niðurstaðan sú að um tæplega hálfan skóla yrði að ræða. Þar sem ekki telst eðlilegt að byggja svo lítinn skóla, er gert ráð fyrir að komið verði til móts við þessa þörf með stækkun Hofstaðaskóla, en einnig má gera ráð fyrir plássi í hinum nýja Sjálandsskóla. Með þessum tillögum er litið til þess að hverfið er ekki sérstætt, eða sjálfbær eining, heldur myndar samstæða heild með
öðrum hverfum í norðurhluta Garðabæjar eins og fyrr er getið. Ef hinsvegar ósk um svokallað skólasetur fyrir yngstu bekki grunnskóla verður ofaná, hefur það einnig verið skoðað. Yrði því fyrir komið samtengdu þeim leikskóla sem fyrir er í tillögunum og með sama hætti og þeim íbúðum sem þar eru einnig sýndar. Sameiginleg aðkoma yrði að byggingunum báðum og yrði miðgarður þeirra nýttur
sameiginlega sem leiksvæði. Við þessa útfærslu fækkar þó íbúðum tillögunar um 24, úr 408 íbúðarrýmum sem sýndar eru í tillögum þessum í 384.

Leitast hefur verið við að skapa opið flæði, þar sem samhengi er á milli opinna almenningsrýma, sameiginlegra íbúðarýma utanhúss og einkarýma íbúanna. Opnum rýmum, götum og torgum er þannig ætlað að vera leiksvið þess samfélags sem skapast mun innan hverfisins. Með þessu er reynt að mynda eitt samáhangandi
hverfissamfélag sem byggir á samkennd íbúanna og umgjörð sameiginlegrar upplifunar. Mikilvægur þáttur í þessu er endurheimt götunnar sem hluta bæjarmyndar og mannlífs og þeirrar einingar sem tengir saman alla þætti umhverfisins. Því er lögð áhersla á
grunneiningu hverfisheildarinnar, götuna, torgið og útivistarsvæðin, hin samnýttu rými ekki síður en byggingarnar sem þau mynda. Í þessu samhengi er átt við leiksvæði og torg en einnig þau svæði sem náttúran flýtur um og tengir saman. Þegar kemur að uppbyggingu nýs hverfis er mikilvægt að huga að fagurfræði: samspili birtu og skugga, litar, áferðar og gróðurs. Þessir þættir móta umhverfið sem heild og eru þannig órjúfanlegir hlutar að góðu manngerðu umhverfi.

Unnið í samvinnu með Anthony Frank Perez.

PDF